(199) પ્રસન્નતા અને ગમગીની

Click here to read in English

અમેરિકા ખાતે સ્થિત મારી ભત્રીજી અનીસાના જન્મદિવસ ઉપરના મારા અભિનંદન પત્રનો એક અંશ : –

“મારી વ્હાલી દીકરી,

આજે તારો જન્મદિવસ છે. હું અહીં ભારત ખાતેના આપણા સંયુક્ત પરિવાર વતી માસુમીન (અ.સ.) ના વસીલા થકી સર્વશક્તિમાન અલ્લાહને દુઆ કરું છું તે પોતાની દયા અને મહેરબાની વડે તારા જીવનમાં દુન્યવી અને આધ્યાત્મિક ઉન્નતિઓ સિદ્ધ થવા માટે તને સહાયરૂપ થાય. (આમીન)

તને ખગોળશાસ્ત્રીય સત્યની જાણ હશે જ કે ૨૧મી જુનના રોજ વર્ષનો લાંબામાં લાંબો દિવસ અને ટૂંકામાં ટૂંકી રાત હોય છે. સાહિત્યિક વર્ણને કહી શકાય કે દિવસ એ સુખનું પ્રતિક છે, તો રાત્રિ એ ગમગીનીનું. હું શું કહેવા જઈ રહ્યો છું તે તું સમજી શકશે કે છેવટે તો જિંદગી એ જિંદગી ત્યારે જ કહેવાય, જ્યારે કે તેમાં સુખ અને દુ:ખનું સંયોજન હોય. હું સાહિત્યમાં રસ ધરાવતો હોઈ આજના શુભ દિવસના પ્રસંગને આ પત્રમાં એ પ્રમાણે સરખાવી રહ્યો છું. પરંતુ, આપણી આચારસંહિતાઓને લાગેવળગે છે, ત્યાં સુધી તો આપણે પરિણામ કે ફળની ની પરવા કર્યા વગર આપણી ફરજો નિભાવ્યે જ જવી જોઈએ; કેમ કે મજહબનો પાયાનો સિદ્ધાંત એ છે કે “આપણે આપણી જાતને અલ્લાહની મરજીને આધીન કરી દેવી જોઈએ’.

આ પત્રના સમાપને કહીશ કે મારાં મંતવ્યો અને મારા વિચારો એક ખુલ્લા પુસ્તક સમાન છે અને તેથી જ તો હું તને ઈજાજત આપું છું કે તને ઠીક લાગે તેઓને તું આ પત્રની વિગત જણાવી શકે છે અને તેનો મને કોઈ વાંધો નથી.

(આજે લખ્યા તા. ૦૬-૦૬-૧૯૯૭)

– વલીભાઈ મુસા

(લેખક અને અનુવાદક)

Translated from English version titled as “Happiness and Gloomy” published on May 06, 2007.

નોંધ : –

મારા સૌથી નાના ભાઈ મરહુમ હાજી ડો. અલીમહંમદ મુસા, M.D. (Internal Medicine), USA માત્ર ૪૧ વર્ષની વયે ટેનિસ રમતાં હૃદયરોગના હુમલાથી અવસાન પામ્યા હતા, ત્યારે અમારી આ દીકરી અનીસા માત્ર સાત વર્ષની હતી. હું ૧૯૯૪માં મરહુમ ડોક્ટરના અવસાન નિમિત્તેની ૪૦ દિવસની મિજલસ (કથા)માં હાજરી આપવા વિઝિટ વિઝાથી અમેરિકા ગયો હતો, ત્યારે મને જાણવા મળ્યું હતું કે અનીસા મરહુમને બહુ જ લાડલી હતી. પોતાના ઓફિસકામેથી ઘરે આવતાં ડોક્ટર પોતાનાં પહેરેલાં કપડે તરત જ પોતાના ખભે બેસાડીને મકાનના તમામ ઓરડાઓમાં તેને ફેરવતા હતા.

આજે આજના દિવસે એટલે કે ૨૧ મી જુન, ૨૦૧૦ ના રોજ જ્યારે તે ૨૩ વર્ષની ઉંમરની થાય છે, ત્યારે મને એમ થયું કે તેની શૈક્ષણિક કારકીર્દિ વિષે અહીં થોડીક માહિતી આપું તો દેશવિદેશમાં વસતાં અમારાં કુટુંબીજનો, સ્નેહીજનો અને મિત્રોને તેની પ્રગતિની જાણ થઈ શકે. અનીસાથી ૪ વર્ષ મોટો આસિફ મિશીગન યુનિવર્સિટીથી Finance માં પોતાનું ગ્રેજ્યુએશન પૂરું કરીને Professional તરીકેની પોતાની કારકીર્દિમાં સારી એવી નામના મેળવી રહ્યો છે. અનીસાએ પોતાનું હાઈસ્કૂલ એજ્યુકેશન વતન એલનટાઉન (PA) માં પૂરું કર્યા પછી ફિલાડેલ્ફીઆ ખાતે Advanced Pharmacy નું શિક્ષણ શરૂ કર્યું જે મે, ૨૦૧૧ માં તેની Doctor of Pharmacy (PharmD) સાથે પૂર્ણ થશે. હાલમાં તેની Internship ચાલી રહી છે. હજુ આગળ Post Graduation પણ કરી લેવાની નેમ ધરાવતી અનીસા પોતાની ભાવી કારકીર્દિ વિષે મને લખે છે: “As for my future plans, I am unsure at this point as to what exactly it is I would like to do, but I know that I would prefer to work in a hospital dealing with clinical work.”

જન્મદિન મુબારક, અનીસા અને સુખમય ભાવી જીવન સાથે માનવતાનાં ઉમદા કાર્યોને પણ અંજામ અપાતો રહે તેવી સૌ હિતેચ્છુઓ વતી દિલી દુઆઓ અને શુભ કામનાઓ સાથે હું વિરમું છું. ખુદા હાફિઝ.

દુઆગીર, વલીકાકા