RSS

Monthly Archives: November 2017

(548) ભૂલો કરે તું માનવ (ગ઼ઝલ) – ૯

તકતી – ગાગાલ ગાલગાલ લગાગાલ ગાલગા (મુઝારીઅ અખરબ)

ભૂલો કરે તું માનવ બહુસંખ્ય જગ મહીં
એ તો ભમાવતી તુજને ખૂબ જગ મહીં

શીખ્યો જરી ન આદમની ભૂલ પારખી
એથી જ તો કરે તું રઝળપાટ જગ મહીં

જન્નત ગુમાવવી જ પડી એક ભૂલથી
બન્યા જ પાયમાલ વ બદહાલ જગ મહીં

શેતાનના ફરેબ થકી છેતરાઇને
ફેંકાવું પડ્યું હાય હવા સાથ જગ મહીં

શેતાન છેતરે તુજને માનવી બની
ઇતબાર કર ન અંધ બની સાવ જગ મહીં

‘માનવ છું, ભૂલ થાય’ કહી એમ જાતને
કરતો ગયો થતી ગઇ ભૂલોય જગ મહીં

અનજાનપણું કરાવતું ભૂલો કદી કદી
એ માફ છે ખચિત જ ભલે થાય જગ મહીં

ભૂલો સતત કરી તું ન નાદાન થા ‘વલી’
આયુષ સકળ સફળ કર થઇ શૂર જગ મહીં

-વલીભાઈ મુસા (‘વલી’ કાણોદરી)

(તા.૧૯૧૧૧૭)

(ફેસબુક – ‘ગ઼ઝલ તો લખું હુંગ્રુપ તા. ૨૧૧૧૧૭)

 

 

 

 

 

 
3 Comments

Posted by on November 30, 2017 in ગ઼ઝલ

 

Tags: , ,

(547) ભલે બૂરું અમારું છે (ગ઼ઝલ) – ૮

તકતી – લગાગાગા  લગાગાગા લગાગાગા લગાગાગા

ભલે બૂરું અમારું છે, અને સારું તમારું છે
નસીબે સાથ દીધો તો, નરસું સારું થવાનું છે.

કરો બે ભાગ ઢગલાના, ગમે તે એકને લઇ લો
કદી મળશે જરા ઓછું, લુટાઈ શું જવાનું છે

તમે થાઓ ભલે રાજા, અભરખો છે  નહીં અમને
અમે તો થૈ પ્રજા જીવશું, ફના આખર થવાનું છે

ભલે તલવાર તમ પાસે, અમે ગરદન ઝુકાવી  છે
નહીં ડરશું  જરીકેયે, ભલા થઇ શું જવાનું છે

તમારા હુંપણા સામે, અમારી મૂછ છે નીચી
કરીશું ના કદીયે ઉફ,  ન તો શૂરા થવાનું છે

તમે કો દી જ નહિ સમજો, બડપ્પન તો વળી ક્યાં છે
બડપ્પન પામવા કાજે, ધરા થૈ  ઝૂકવાનું છે

અમસ્તા વેડફીશું ના, અમારી શક્તિને ઠાલી
ઘણાં કામો અધૂરાં કાજ અવને જીવવાનું છે

‘વલી’ નમવું  અને ગમવું, ખુદાને એ જ તો વાલું
નિભાવી લઇ  ન ગમતું સર્વ નિજને જીતવાનું છે.

-વલીભાઈ મુસા (‘વલી’ કાણોદરી)

(તા.૧૫૧૧૧૭)

(ફેસબુક – ‘ગ઼ઝલ તો લખું હું’ ગ્રુપ તા. ૧૯૧૧૧૭)

= = =

રસદર્શન:

કવિ શ્રી, વાર્તાકાર શ્રી વલીભાઈ મુસાના નામથી સોશીયલ મિડીયામાં ભાગ્યે જ કોઈ અજાણ્યું હશે. વેબગુર્જરીમાં સંપાદક તરીકે હોવા ઉપરાંત તેઓશ્રી “William’s Tales” અને “વલદાનો વાર્તાવૈભવ” નામે બ્લોગ પણ ચલાવે છે. આ ગઝલે મારું ખાસ ધ્યાન ખેંચ્યું કારણકે આ ગઝલનાં દરેક શેરમાં કવિ કોઈને કોઈ સલાહ આપી જાય છે.જે જીવનમાં ઉતારવા જેવી છે. મત્લાના શેર માં કવિ કહે છે કે ભલે બધું સારું તમારું અને બધું બુરું અમારું છે. પણ જો નસીબે સાથ અમને આપ્યો તો નરસું પણ સારું થવાનું છે. એટલે બીજાના સારાં નસીબને કોસવાને બદલે આજ તમારાં સારા દિવસો છે તો કાલે અમારાં દિવસો સારાં આવશે ની આશા રાખે છે. બીજા શેરમાં કવિ જે ઈશ્વરે આપ્યું તેમાં સંતુષ્ટ છે કોઈને વધું કોઈને ઓછું ઈશ્વર આપે છે તો કવિ બેધડક કહે છે કે આ બે ઢગલા છે જે જોઈએ એ લઈ લો એક મોટો નાનો હોય તો શું લૂંટાઈ જવાનું છે. ત્રીજા શેરમાં કવિ કહે છે કે ભલે તમે મોટી પદવી પર બેસી જાઓ, રાજા થઈ જાઓ અમે પ્રજા રહીશું..અને રાજા કે પ્રજા છેવટે તો દરેકે ફના થવાનું છે. ચોથા શેરમાં પણ એજ ભાવના બતાવે છે કે ભલે તમારી પાસે તલવાર હોય અમે આ ગરદન ઝૂકાવી છે, મોતની એમને બીક નથી થઈ થઈને શું થઈ જવાનું છે? અને હું કરું હું કરું એજ અજ્ઞાનતાની વાત કરે છે કે તમારાં હું પણ સામે અમે અમારી મૂંછ નીચી કરી છે..આ જુનાં જમાનાની યાદ આપે છે, કોઈના અહમને સંતોષવા પહેલા પાઘડી ઉતારતા મૂંછ નીચી કરતા!! હાં, તો એમાં શું બગડી જવાનું છે!! મૂંછે તાવ દઈ શું શુરા થવાનું..અહીં એક કહેવત યાદ આવી કે ઝુકતે તો ઝિન્દા લોગ હૈ..અકડ તો મુર્દેમે હોતી હૈ!! એ પછીના શેર માં પણ એજ ભાવના બતાવામાં આવી છે.મોટાઈ ધરા થઈ ઝૂકવામાં છે.બીજાની વાતો બીજાની નિંદા અને બીજાના પગ ખેંચવાના કાવત્રા એ બધાંમાં શક્તિ શા માટે વેડફવી? કરમ કીએ જા ફલ કી ઈચ્છા ના કર.જીવનમાં કેટલાં કામ અધૂરાં છે એનાં માટે જીવવાનું છે..લોકોની વાતો સામે કાન આડે હાથ કરી ચાલવાનું છે.મકતાના શેરમાં નમ્યાં તે ખુદાને ગમ્યાં કહેવતને સચોટ રીતે દર્શાવી છે કે નમવું અને ગમવું ખુદાને વાલું છે. એટલે ન ગમતાને પણ નિભાવી લઈ ખુદાની ખુશી મેળવી લેવી છે એ રીતે પોતાની જાતને જીતવાની છે.ખૂબ સુંદર ગઝલ!! કવિ શ્રી વલીભાઈને એક ઉત્તમ વાર્તાકાર તરીકે જાણતી હતી..આ ગઝલ વાંચી સલામ કરવાનું મન થાય છે.

-સપના વિજાપુરા happy new year (‘ધી મેસેજ’ ઉપર પ્રસિદ્ધ)

 

 

 

 

 

 

 

 

 
4 Comments

Posted by on November 26, 2017 in ગ઼ઝલ

 

Tags: , ,

(546) ઘરવાળી છે (ગ઼ઝલ) – ૭

Image Courtesy – ‘Story Mirror’

ઘરવાળી છે (ગ઼ઝલ)

(ગાગાગાગા લગાલગા ગાગાગાગા)

વાતેવાતે કરે કલહ ઘરવાળી છે
સુખદુ:ખમાં જે  ખડી રહે ઘરવાળી છે.

મોહક દીસે ભલે અધિક એ પરનારી
સીધીસાદી સમી ભલે ઘરવાળી છે

ટાઢુંઊનું  જમાડતી ઘરવાળી છે  
રીઝેરીસે  છતાંય એ ઘરવાળી છે

મન વાણી શીલ નિત નવાં સુથરાં રાખો
તારે મનખો અને તરે ઘરવાળી છે.

દુનિયાદારી મધુર છતાં પેચીદી છે
ટેકો આપે વિપદ પડે ઘરવાળી છે

ધીરા ચાલો કદમ કદમ પર જોખમ છે
ખંધો મજબૂત જે ધરે ઘરવાળી છે

તપભંગને કાજ મેનકાઓ આતુર છે
પુરુષનું ઢાંકણ વ મિત ખરે ઘરવાળી છે 

અન્યોને શીખ દે ‘વલી’ પણ સમજી લે
ઘરની શોભા જ વાસ્તવે ઘરવાળી છે  

-વલીભાઈ મુસા (‘વલી’ કાણોદરી) 

(તા.૦૬૧૧૧૭)

(ફેસબુક – ‘ગ઼ઝલ તો લખું હું’ ગ્રુપ તા.૧૫૧૧૧૭)

*‘સ્ટોરી મિરર’ દાંપત્ય કાવ્ય સ્પર્ધા- નવેમ્બર, ૨૦૧૭માં આ ગ઼ઝલ ઈનામપાત્ર નીવડી છે.

 

 

 

 

 

 

 

 

 

 
2 Comments

Posted by on November 23, 2017 in ગ઼ઝલ

 

Tags: , ,

(545) ક્યાંક ખીલે (ગ઼ઝલ) -૬

ક્યાંક ખીલે (ગ઼ઝલ)

(ગાલગાગા ગાલગાગા ગાલગા)

ક્યાંક ખીલે કોક પુષ્પો બાગમાં
તો વળી કો ક્યાંક તો કરમાય છે.

બાળકુસુમો જન્મ પામે ને મરે
કુદરતી એ ક્રમ અહીં વર્તાય છે.

કોક પામે માનમોભો તો વળી
કો બિચારો વાંકવણ નંદવાય છે

ગાય કોઈ લગ્નગીતો હર્ષમાં
કે પછી કો મરશિયાને ગાય છે.

ક્યાંક જો ને પેટ મોટાં થાય છે
તો વળી કો પેટ સંકોચાય છે.

બે ધ્રુવોનો ફાસલો છે એટલો
કે કદી ના મેળ એનો થાય છે

આંખમાં ખૂંટો ફરે તો મોતને
માગવું ના દર્દ છો ને થાય છે

લાગણીની વાત છે ન્યારી ઘણી
ક્યાં કદી કો’થી વળી પરખાય છે

તુંય કેવો સાવ ભોળો છે ‘વલી’
કે તને સૌ શીઘ્ર ધૂતી જાય છે

-વલીભાઈ મુસા (‘વલી’ કાણોદરી)

(તા.૦૪૧૧૧૭)

(ફેસબુક – ‘ગ઼ઝલ તો લખું હું’ ગ્રુપ તા.૦૪૧૧૧૭)

 

 

 

 

 

 

 

 

 

 
3 Comments

Posted by on November 20, 2017 in ગ઼ઝલ

 

Tags: , , ,

(544) પુરપાટ ઝડપે (ગ઼ઝલ) – ૫

પુરપાટ ઝડપે (ગ઼ઝલ)

(ગાગાલ લલગા ગાલગા ગાગાલગા)

પુરપાટ ઝડપે દોડતી આ ટ્રેનમાં
પ્યાલો છલકતો  જળ તણો મુજ હાથમાં

ચકરભમર ભમે પૃથિવી તો વેગમાં
પ્રોવી શકું જુઓ ને હું ધાગો સોયમાં

નયનો સહુ મનુજનાં દીસે  જે એકશાં
પરખાય નફરત  મોહબત  પળવારમાં

શિશુ ખેલતું જનેતા તણી જ્યાં ગોદમાં
મમતા ચમકતી સ્નેહમય એ નયનમાં

નિરખાય કદી કારુણ્યતા કો આંખમાં
યા તો ઉકળતો ક્રોધ કોઈ ચક્ષુમાં

વૈવિધ્ય ઉભરે કેટલાંયે નેત્રમાં
લીલા પ્રગટતી ઈશની એ સર્વમાં

ફસતો નહિ કદી આ  જગે ભાઈ ‘વલી’
ચોતરફ ભમતી ગૂઢ માયાજાળમાં

-વલીભાઈ મુસા (‘વલી’ કાણોદરી)

(તા.૧૯૧૦૧૭)

(ફેસબુક – ‘ગ઼ઝલ તો લખું’ ગ્રુપ તા.૦૭૧૧૧૭)

 

 

 

 

 

 

 

 

 
3 Comments

Posted by on November 17, 2017 in ગ઼ઝલ

 

Tags: , , ,