(566) કાગનો વાઘ છે (ગ઼ઝલ) -૨૩

તકતી – ગાલગા * 4  (મુતદારિક મુસમન સાલિમ)

કાગનો વાઘ છે, વાતમાં દમ નથી,
ચિત્રનો વાઘ છે, એ કંઈ જમ નથી.

જામ શરબત તણો હાથમાં  છે લીધો,
માનશો  ના ભલે, કિંતુ એ રમ નથી.

આગ ભડકાવતા શાસકો  ખુદ પછી,
શાંતિને યાચતા શાઠ્ય એ કમ નથી.

કોમને  કોમથી  ડારવી  છળ થકી,
સેક્યુલર શબ્દ શું શાબ્દિક ભ્રમ નથી?

રાજકારણ બન્યું  મિન્ટ બીજું  જ તો,
ખાયકી તેઉની શ્યામધન સમ નથી?

લોકશાહી  બિચારી વહાવે લહૂ,
દૂઝતા ઘાવનો  કોઇ મરહમ નથી?

ચોરને સોંપવું ચોરનું પકડવું,
ખેલ જોઈ ‘વલી’  શું તને ગમ નથી?

(રમ= એક પ્રકારનો દારૂ; સેક્યુલર= બિનસાંપ્રદાયિક; મિન્ટ=ટંકશાળ) 

-વલીભાઈ મુસા (‘વલી’ કાણોદરી)

(તા.૦૩૦૧૧૮)

 

(૪૨૧) મારાં હાઈકુ (પ્રકીર્ણ) ભાગ -૧૨ (ક્રમાંક -૧૭૭ થી ૧૮૮)

સૂર્યાગમને,
નિશાચર સંતાડી,
નિશા ભાગતી ! (૧૭૭)

ઇક્ષુપિલાણે
શ્વેત વિષ સર્જાતું,
શુગરમિલે ! (૧૭૮)

ઘેઘુર વડ,
લંબાવે વડવાઈ
ભાર ઝીલવા ! (૧૭૯)

વીજખડગે
વાદળ ચિરાતાં, ને
વારિ દદડે ! (૧૮૦)

વીજ ત્રાટકે,
ના પ્રજળે, જુઓ ને
રૂ-પુંજ વાદળો ! (૧૮૧)

ભૂ છલાછલ,
વાદળમાથે સાવ,
કોરું ધાકોડ ! (૧૮૨)

વ્હેલી પરોઢે,
કાગ જગાડે ખગ,
’ભોર ભઈ, લ્યાં !’ (૧૮૩)

સૂરજમુખી,
સૂર્યભણી મિટડે,
નવ અંજાતું ! (૧૮૪)

પ્રસવે માતા,
બે જીવમાંથી થાતી,
એકલો જીવ ! (૧૮૫)

ખેતમૂષક,
નહિં હોય લ્યા ભાઈ,
યુરોપિયન ? (૧૮૬)

મધ્યમવર્ગી
ઘંટીપડિયાં વચ્ચે,
રોજ પિસાતો ! (૧૮૭)

થઈ ભૂલકું,
થાઉં ભુલક્કડ, હા
મજો મજો ભૈ ! (૧૮૮)

– વલીભાઈ મુસા