(548) ભૂલો કરે તું માનવ (ગ઼ઝલ) – ૯

તકતી – ગાગાલ ગાલગાલ લગાગાલ ગાલગા (મુઝારીઅ અખરબ)

ભૂલો કરે તું માનવ બહુસંખ્ય જગ મહીં
એ તો ભમાવતી તુજને ખૂબ જગ મહીં

શીખ્યો જરી ન આદમની ભૂલ પારખી
એથી જ તો કરે તું રઝળપાટ જગ મહીં

જન્નત ગુમાવવી જ પડી એક ભૂલથી
બન્યા જ પાયમાલ વ બદહાલ જગ મહીં

શેતાનના ફરેબ થકી છેતરાઇને
ફેંકાવું પડ્યું હાય હવા સાથ જગ મહીં

શેતાન છેતરે તુજને માનવી બની
ઇતબાર કર ન અંધ બની સાવ જગ મહીં

‘માનવ છું, ભૂલ થાય’ કહી એમ જાતને
કરતો ગયો થતી ગઇ ભૂલોય જગ મહીં

અનજાનપણું કરાવતું ભૂલો કદી કદી
એ માફ છે ખચિત જ ભલે થાય જગ મહીં

ભૂલો સતત કરી તું ન નાદાન થા ‘વલી’
આયુષ સકળ સફળ કર થઇ શૂર જગ મહીં

-વલીભાઈ મુસા (‘વલી’ કાણોદરી)

(તા.૧૯૧૧૧૭)

(ફેસબુક – ‘ગ઼ઝલ તો લખું હું’ ગ્રુપ તા. ૨૧૧૧૧૭)